Gazeta Exposé ka siguruar disa materiale komprometuese—video dhe fotografi—ku shfaqet një burrë duke komunikuar me një vajzë, e cila dyshohet të jetë e mitur.
Pamjet e analizuara me kujdes ngrenë dyshime të forta mbi identitetin e këtij burri, i cili përngjan jashtëzakonisht shumë me ish-kryeshefin e Korporatës Energjetike të Kosovës, Nagip Krasniqi.
Në bisedat e kapura, vajza në fjalë e përsërit disa herë se është ende e re, por pavarësisht kësaj, burri në anën tjetër të komunikimit këmbëngul për një takim, madje duke i dërguar asaj materiale me përmbajtje eksplicite.
Nëse vërtetohet se personi në fjalë është vërtet Nagip Krasniqi, atëherë bëhet fjalë për një skandal të rëndë që ngre shqetësime të mëdha për moralin dhe integritetin e një ish-zyrtari të lartë të shtetit.
Diskutimet për këtë çështje kanë qarkulluar në media të ndryshme për një kohë, por deri më tani, askush nuk ka sjellë dëshmi konkrete. Publikimi i këtyre materialeve mund të shërbejë si një pikënisje për një hetim të thelluar nga organet kompetente, të cilat duhet të përcaktojnë saktësisht identitetin e personit dhe të zbardhin të vërtetën.
Nagip Krasniqi, ish-kryeshefi i Korporatës Energjetike të Kosovës, është duke u ballafaquar me drejtësinë nën dyshimet për shpërdorim të detyrës zyrtare dhe dëmtim të buxhetit të shtetit në vlerë prej 35 milionë eurosh. Sipas hetimeve të autoriteteve, vendimet e tij gjatë menaxhimit të KEK-ut dyshohet se kanë sjellë humbje të konsiderueshme financiare për ndërmarrjen publike dhe për ekonominë e vendit.
