Grupi “Asnjë cent më shumë”, kanë organizuar sërish protestë kundër vendimit të Zyrës së Rregullatorit për Energji (ZRRE) për rritjen e tarifave të energjisë elektrike.
Protesta do të mbahet të shtunën, më 19 prill, duke filluar nga ora 12:00 në Sheshin Skënderbe në Prishtinë.
Organizatorët bëjnë thirrje për pjesëmarrje masive, duke theksuar se vendimi për rritjen e çmimit është marrë pavarësisht kundërshtimeve të shumta dhe të argumentuara nga qytetarë, organizata të shoqërisë civile, ekspertë dhe përfaqësues të komunitetit të biznesit.
Kërkesat kryesore të protestës janë:
- Shfuqizimi i vendimit për rritjen e tarifave të energjisë elektrike;
- Shkarkimi i Bordit të ZRRE-së nga Kuvendi i Republikës së Kosovës.
“Ky nuk është vetëm një reagim ndaj rritjes së çmimit të rrymës. Kjo është një thirrje kundër gjithë barrës ekonomike që po u vendoset qytetarëve, ndërsa çmimet e produkteve dhe shërbimeve po bëhen të papërballueshme për shumëkënd,” thuhet në deklaratën e organizatorëve.
