Edhe dy ditë bëhet një javë që nga zgjedhjet e 9 shkurtit, mirëpo qytetarët, të cilët votuan të dielën, ende nuk e kanë marrë vesh se cila parti do e qeverisë shtetin.
Kjo për shkak të problemeve teknologjike të Komisionit Qendror të Zgjedhjeve, faqja e së cilit doli të jetë hakuar, raporton Kiks Kosova.
Madje, dyshimet u ngritën se në të pati gisht ndonjë parti politike.
Dyshime pati se qytetarëve, të cilët e kanë vizituar faqen e KQZ-së, u janë vjedhur të dhënat personale.
Nuk mjaftoi vetëm kjo.
Elektorati ende nuk e di se cilët prej kandidatëve do të bëhen deputetë në Kuvendin e Kosovës.
Me të rënë sistemi, votat e numëruara duhet të rinumërohen prej fillimit.
E kjo po ndodh goxha shpesh në qendrat komunale të numërimit. Për dhjetëra herë sa faqja elektronike e Komisionit Qendror të Zgjedhjeve pati telashe.
Mirëpo, numërimi nga zero nuk ka ndodhur në secilin rast.
E derisa këto probleme teknike të sanohen, numërimit të votave nuk po i shihet fundi.
Sipas shoqërisë civile, mesatarisht për 8 orë po numërohet vetëm një kuti e votave.
