Mesfushori i Malishevës, Etnik Brruti ka mohuar lajmet rreth vendimit të tij përfundimtar për të ndërruar Kombëtaren e Kosovës me atë të Shqipërisë.
Gjatë ditës së sotme (e shtunë) u raportua se mesfushori Etnik Brruti ka vendosur ta lë fanellën e Kosovës për atë të Shqipërisë.
Një gjë të tillë e konfirmoi edhe trajneri i Kosovës U-21, Afrim Tovërlani, i cili tha se Brruti i ka njoftuar me vendimin e tij për të luajtur me Shqipërinë.
Megjithatë, ylli i Malishevës, edhe pse ka konfirmuar ftesën nga kuqezinjtë, ka thënë se ai ende nuk ka vendosur se për cilën kombëtare të luajë.
“Po më ka thirr Kombëtarja e Shqipërisë. Jam duke menduar, nuk kam vendosur ende”, ka thënë Brruti për Telegrafin.
Ndryshe, Brruti ka qenë së fundmi kapiteni i Kosovës U-21 dhe titullar i padiskutueshëm i Dardanëve.
