Fushata zgjedhore në Kosovë ka hyrë në javën e saj të dytë, me partitë opozitare të përqendruara kryesisht në prezantimin e programeve të tyre politike dhe thirrje për unitet, ndërkohë që, ndryshe nga opozitën, retorika e zyrtarëve të Lëvizjes Vetëvendosje po tërheq vëmendje në opinion për gjuhën e ashpër dhe intensifikimin e veprimeve që rrezikojnë seriozisht lirinë e medias dhe fshehtësinë e procesit të votimit.
Që nga nisja zyrtare e fushatës zgjedhore, partitë opozitare po vazhdojnë të ndjekin një qasje më të moderuar në adresimet e tyre, duke u fokusuar kryesisht në prezantimin e programeve të tyre politike.
Në kontrast enorm me këto parti, ende në mungesë të një programi qeversisë, retorika e zyrtarëve të Lëvizjes Vetëvendosje ka tërhequr vëmendje për fyerje, akuza dhe ofendime, të drejtuara si ndaj kundërshtarëve politikë, ashtu edhe ndaj mediave.
Një nga më të theksuarat për nga tendenca e përçarjes, ishte deklarata e ministrit të Punëve të Brendshme, Xhelal Sveçla. Ai u shpreh se “asnjë shqiptar i ndershëm” nuk duhet të mbështesë opozitën, duke e akuzuar atë për, sipas tij, “fyerje ndaj institucioneve të Kosovës”.
“Askush, asnjë shqiptar i ndershëm nuk duhet t’i përkrahë ata,” deklaroi Sveçla.
Ndërsa Kosova i afrohet zgjedhjeve, pushteti ka intensifikuar edhe veprimet që cenojnë rëndë fshehtësinë e votimit.
Ditët e fundit janë raportuar raste të organizimit të paligjshëm të procesit të votimit në diasporë, ku përfaqësues të partisë në pushtet dyshohet se kanë ndikuar në plotësimin e fletëvotimeve. Prokuroria ka nisur hetime mbi këto veprime që cenojnë fshehtësinë e votës.
Ndërkohë, opinioni publik u trondit të premten pas kapjes së Komisionit të Pavarur të Mediave (KPM) nga pushteti. Zgjedhja e Besnik Berishës si kryetar i ri e këtij institucioni, pak ditë para përfundimit të mandatit të kryetarit aktual, Jeton Mehmeti, është konsideruar si një akt që minon pavarësinë e KPM-së.
Juristja e medias, Flutura Kusari, kritikoi ashpër këtë vendim, duke e cilësuar si një “kompletim të kapjes politike” të KPM-së nga Qeveria.
“Kapja politike e KPM-së u kompletua ✅Sic ju paralajmërova: 1. Rregullorja e re u ndryshua kundërligjshëm 2. Jeton Mehmeti u shkarkua De Facto nga pozita e kryetarit tëKPM-së 3. KPM tash ka kryetar jolegjitim. Ky është sulm politik ndaj pavarësisë së Komisionit të Pavarur për Media dhe është bërë për të ushtruar presion në televizione. Ne punën tonë e kryme, e dokumentuam kapjen politike nga pushteti të KPM-së.” – tha Kusari.
100 vëzhgues nga BE-ja
Bashkimi Evropian së fundi caktoi një ekip prej 100 vëzhguesish për të ndjekur nga afër procesin zgjedhor, duke theksuar “mbështetjen e vazhdueshme të BE-së për Kosovën në forcimin e qeverisjes demokratike.”
Këto zgjedhje do të shërbejnë për të “përfaqësuar pluralizmin e peizazhit politik të Kosovës”, ka shkruar Washington Post, duke cituar përfaqësuesen franceze të Parlamentit Evropian dhe shefe e këtij misioni, Nathalie Loiseau.
Loiseau theksoi rëndësinë e këtyre zgjedhjeve në një kohë kur “demokracitë janë të sfiduara dhe ndonjëherë nën kërcënim globalisht.” Ajo shtoi se “rëndësia e të pasurit një demokraci të gjallë në Kosovë nuk ka qenë kurrë më e madhe.”
Fushata zyrtare, e cila filloi më 11 janar, do të zgjasë deri më 7 shkurt, ndërsa zgjedhjet parlamentare do të mbahen më 9 shkurt, transmeton nacionale.
Në këtë proces zgjedhor pritet të marrin pjesë 27 subjekte politike, të cilat do të garojnë për 120 vendet e Kuvendit të Kosovës. Ndërkohë, procesi i votimit për rreth 100,000 votues të regjistruar jashtë vendit tashmë ka nisur me postë.