Zgjedhjet e 9 shkurtit sollën rezultate, pak më ndryshe nga ato të 14 shkurtit 2021.
Renditja e partive nuk ka ndryshuar, por numri i votave që kanë fituar po.
Lëvizja Vetëvendosje e ka ruajtur dominimin, por me përqindje më të vogël. Përderisa, PDK-ja vazhdon të jetë e dyta, me LDK-në të tretën.
Por, sa kishin fituar partitë në zgjedhjet e vitit 2021, dhe sa kanë tash?
Bazuar në rezultatet e KQZ-së me gati 90% të votave të numëruara, Lëvizja Vetëvendosje aktualisht ka 41.00% të votave, apo 311 mijë e 872 vota.
Në zgjedhjet e vitit 2021, Vetëvendosje kishte pasur mbi 50% të votave, apo në shifra, mbi 438 mijë vota. Duke mos llogaritur votat e diasporës, Vetëvendosje ka humbur rreth 100 mijë vota për dallim nga zgjedhjet e para katër vitesh.
Rritje në vota ka Partia Demokratike e Kosovës. Aktualisht, PDK-ja ka 22.35% apo 170 mijë vota. Para katër vitesh, partia e drejtuar nga Memli Krasniqi kishte pasur 17% apo 110 mijë vota. Pra, PDK-ja ka rritje mbi 60 mijë vota, pa llogaritur votat me kusht e të diasporës.
Rritje në vota ka edhe Lidhja Demokratike e Kosovës. Aktualisht, sipas KQZ-së, partia e Lumir Abdixhikut ka 17.58% të votave, apo 133 mijë e 676 vota. Në zgjedhjet e 14 shkurtit 2021, LDK-ja kishte pasur 12.73% apo 110 mijë vota.
Rënie në vota duket të ketë pasur edhe AAK-ja. Përderisa në zgjedhjet e vitit 2021, si parti e vetme morën 7.12%, tash bashkë me Nismën, ata kanë mbi 7.5%.
Votat nëpër komuna
MITROVICË
Komisioni Qendror i Zgjedhjeve ka numëruar gati 90% të votave në Mitrovicë.
Atje, Vetëvendosje ka fituar me mbi 55% apo 16 mijë vota.
Partia Demokratike e Kosovës ka 30% apo mbi 9 mijë vota, kurse LDK-ja 6.41% apo mbi 1 mijë e 800 vota.
GJILAN
Komisioni Qendror i Zgjedhjeve ka përditësuar rezultatet e zgjedhjeve të 9 shkurtit.
Sipas rezultateve, ku deri tash janë numëruar 78.29 për qind e votave, Vetëvendosje në Gjilan ka dalur e para me 51.54 për qind apo 18 mijë e 813 vota.
E dyta është LDK me 21.73 për qind me 7 mijë e 933 vota, ndërsa PDK është e treta me 6 mijë e 229 vota apo 17.06 për qind.
AAK ka marrë 996 vota apo 2.73 për qind.
PRISHTINË
Komisioni Qendror i Zgjedhjeve ka përditësuar rezultatet e zgjedhjeve të 9 shkurtit.
Sipas rezultateve, ku deri tash janë numëruar 94.19 për qind e votave, Vetëvendosje në Prishtinë ka dalur e para me 46.80 për qind apo 51 mijë e 631 vota.
E dyta është LDK me 25.54 për qind me 28 mijë e 178 vota, ndërsa PDK është e treta me 20 mijë e 333 vota apo 18.43 për qind.
PRIZREN
Komisioni Qendror i Zgjedhjeve ka përditësuar rezultatet e zgjedhjeve të 9 shkurtit.
Sipas rezultateve, Vetëvendosje në Prizren ka dalur e para me 40.78 për qind apo 25 mijë e 111 vota.
E dyta është PDK me 22.85 për qind me 14 mijë e 70 vota, ndërsa LDK është e treta me 6 mijë e 567 vota apo 10.66 për qind.
AAK ka marrë 2 mijë e 935 vota apo 4.77 për qind.
Ky rezultat është nga 91.10 për qind të votave të numëruara në këtë komunë.
PEJË
Në Pejë, janë numëruar 81% e rezultateve.
Atje, VV-ja ka fiuar 41.50% apo mbi 15 mijë vota.
Lidhja Demokratike e Kosovës ka fituar mbi 10 mijë vota, apo 28%.
AAK-Nisma kanë fituar mbi 4 mijë e 500 vota, apo 12.7%.
Kurse, PDK-ja 3 mijë e 600 vota apo 10.09%.
FERIZAJ
Edhe në Ferizaj, VV-ja ka fituar bindshëm.
Atje, partia në pushtet ka marrë 51% apo gati 26 mijë vota.
PDK-ja ka fituar 27.53% apo afër 14 mijë vota.
Lidhja Demokratike e Kosovës ka fituar 12.82%, apo mbi 6 mijë e 500 vota.
GJAKOVË
Në Gjakovë, Vetëvendosje ka fituar 47.15% apo gati 17 mijë e 500 vota.
Aleanca me Nismën kanë fituar 19.70% apo 7 mijë e 300 vota.
LDK-ja atje ka marrë 16.68% apo mbi 6 mijë e 100 vota, kurse PDK-ja 10.23% apo gati 3 mijë e 800 vota.
