Lirim Sylejmani, një shtetas amerikan i natyralizuar me origjinë nga Kosova, ka pranuar se ka marrë trajnime ushtarake nga organizata terroriste ISIS.
Pranimi fajësisë nga 48-vjeçari u dorëzua zyrtarisht në Gjykatën e Qarkut të ShBA-së në Uashington DC me akuza në lidhje me përfshirjen e tij me grupin ekstremist, sipas një njoftimi të Departamentit të Drejtësisë në ShBA, raporton Klankosova.tv.
Prokurori i ShBA-së, Matthew M. Graves, së bashku me zyrtarë të tjerë, theksoi kërcënimin e vazhdueshëm nga organizata si ISIS dhe vendosmërinë e zbatimit të ligjit për të ndjekur penalisht ata që përfshihen me grupe terroriste.
“Kjo prokurori tregon se ata që kërkojnë të mbështesin terrorizmin do të paguajnë një çmim të rëndë”, tha Graves.
Marrëveshja për pranimin e fajësisë përshkruan se Sylejmani ka marrë trajnimin e tij ushtarak nga ISIS-i në Siri ndërmjet nëntorit 2015 dhe shkurtit 2019, sipas Departamentit të Drejtësisë.
Dokumentet e gjykatës zbuluan se Sylejmani, derisa po jetonte në Kosovë, udhëtoi në Siri me familjen e tij për t’iu bashkuar ISIS-it dhe, nga viti 2015 deri më 2019 iu nënshtrua një programi trajnimi të ushtarëve, i cili përfshinte përdorimin e armëve të ndryshme të zjarrit.
Pas përfundimit të këtij trajnimi, Sylejmani bëri betimin për besnikëri ndaj ish-liderit të ISIS-it, Abu Bakr Al-Baghdadi. Ai i shërbeu grupit në cilësi të ndryshme, duke përfshirë pjesëmarrjen në luftimet e vijës së parë gjatë të cilave u plagos.
Me rënien e Kalifatit të ISIS-it, Sylejmani lëvizi disa herë përpara se të kapej nga Forcat e Koalicionit në shkurt 2019. Ai u burgos nga Forcat Demokratike Siriane dhe më vonë u transferua në paraburgim në ShBA për t’u përballur me akuza penale.
Çështja, si rezultat i një hetimi të plotë nga Task Forca e Përbashkët kundër Terrorizmit e FBI-së, u ndoq penalisht nga një ekip që përfshin ndihmës avokatë të ShBA-së dhe një avokat gjykues nga Seksioni Kundër Terrorizmit i Divizionit të Sigurisë Kombëtare. /Klankosova.tv
