Në mesin e disa të dyshuarve për vendosjen e barrikadave në veri gjatë vitit 2022, janë edhe dy zyrtarë të Listës Serbe.
Kryetari i saj Zlatan Elek dhe anëtari tjetër Slavko Simiq, të dy deputetë në Kuvendin e Kosovës janë ftuar për intervistim nga Prokuroria Speciale e Kosovës.
Por, kjo procedurë është shtyrë për një datë tjetër.
“PSRK, zbaton në përpikëri procedurat ligjore në përputhje me Kushtetutën, dhe në mënyrë të barabartë për secilin qytetarë të Republikës së Kosovës. Intervistimi është shtyrë për një datë tjetër brenda këtij muaji dhe për veprimet tjera, do të njoftoheni në kohë”- Arbnora Luta, Zëdhënëse e Prokurorisë Speciale
Dy deputetët serbë dyshohen për veprat penale “pengim i personit zyrtar në kryerjen e detyrave zyrtare”, “thirrje për rezistencë”, dhe “bashkimi në veprimtari kundër kushtetuese”.
Për këtë çështje është pyetur deputeti tjetër i kësaj partie Igor Simiq, para seancës së sotme të Kuvendit.
Ai ka thënë se do t’i përgjigjen pozitivisht ftesës, derisa ka bërë akuza në drejtim të Qeverisë.
“Do t’i përgjigjemi thirrjes, jo sepse besojmë se është një proces i drejtë, por sepse e dimë që gjithmonë kemi kërkuar paqe dhe nuk kemi bërë asgjë të paligjshme, ndërsa ata që kanë organizuar protesta të dhunshme këtu në Prishtinë dhe kanë djegur automjete ndërkombëtare, ata janë në qeveri”, – Igor Simiq, Deputet i Listës Serbe
Nga dhjetori i vitit 2022, disa nga rrugët e veriut ishin bllokuar për tri javë me automjete të rënda. Ato ishin vendosur pas arrestimit të ish-zyrtarit policor serb, Dejan Pantiq, i cili dyshohet se ka kryer vepra penale terroriste.
