Veteranët e UÇK-së kanë bllokuar hyrjen e hotelit ku po qëndron kryetarja e Dhomave të Specializuara të Kosovës, Ekaterina Trendafilova.
“Rroftë Hashim Thaçi, UÇK”, janë disa nga fjalët që u dëgjuan teksa i thanë veteranët të cilët janë duke protestuar pas vizitës së Trendafilovas në Kosovës.
Sipas tyre, vizita e saj është e papranueshme dhe fyese për ata që dhanë jetën për liri.
Pos Trendafilovas e cila ka paralajmëruar se pas pak do të mbajë konferencë për media, edhe OVL-UÇK ka njoftuar një të tillë në oborrin e hotelit ku po qëndron kryetarja e Dhomave të Specializuara.
Anëtarët e OVL-UÇK-së kanë hedhur tym të zi pranë hotelit ku po mban konferencë kryetarja e Dhomave të Specializuara, Ekaterina Trendafilova.
Veteranët u dëgjuan teksa thërrisnin “UÇK, UÇK”.
Organizatat e dala nga lufta në një reagim të përbashkët kanë deklaruar të hënën se vizita e kryetares së Dhomave të Specializuara është e papranueshme dhe fyerje.
Ata kanë thënë se vizita e saj s’ka asgjë të përbashkët me drejtësinë dhe transparencën, teksa përmenden edhe “qasjen arrogante të Gjykatës Speciale”.
“E njëjta gjykatë që heshti për krimet serbe mbi civilët shqiptarë, sot vjen në Kosovë si “autoritet drejtësie”, por nuk ka guxim të përballet me opinionin publik. Kjo është hipokrizi e pastër! Ne, OVL, SHIL dhe SHFD, ritheksojmë kundërshtimin tonë të plotë dhe të palëkundur ndaj kësaj vizite. Kërkojmë nga institucionet e Kosovës që të mos bëhen pjesë e kësaj fasade, dhe i ftojmë të gjithë qytetarët, shoqatat e dala nga lufta dhe mediat e pavarura, të qëndrojnë në krah të së vërtetës dhe sakrificës sonë të përbashkët”, thuhet në reagim.
