Policia e Kosovës ka njoftuar se nga data 3 prill do të fillojë dërgimin e gjobave të trafikut në adresë të pronarit të automjetit për kundërvajtjet e identifikuara përmes kamerave dhe radarëve.
Në njoftimin e Policisë thuhet se gjobat do të dërgohen përmes Postës së Kosovës dhe përmes platformës e-Kosova.
Policia ka njoftuar se pronari i automjetit do të pranojë gjobën në adresën e tij.
“Nëse ai nuk ishte drejtuesi i mjetit në momentin e shkeljes, është i detyruar të sigurojë të dhënat e shoferit”, thuhet në njoftim.
Mosdorëzimi i këtyre të dhënave thuhet se sjell masa ligjore për personat fizikë dhe juridikë.
Në njoftim thuhet se kundërvajtësit do të përfitojnë 50% zbritje në pagesë, nëse e paguajnë gjobën brenda afatit ligjor.
Gjithashtu thuhet se qytetarët kanë të drejtën e ankesës nëse nuk pajtoheni me gjobën.
Në njoftim thuhet se qytetarët që kanë shitur automjetet duhet t’i njoftojnë autoritetet.
“Nëse nuk e keni më në pronësi një automjet, njoftoni autoritetet dhe transferoni pronësinë, për të shmangur gjobat dhe shqetësimet e panevojshme”, thuhet në njoftim.
