KOMUNIKATË PËR SHTYP
Prishtinë, 07 gusht 2025
Inkurajimi i pjesëmarrjes në protestën e veteranëve
Në mbështetje të protestës së veteranëve për çështje të interesit madhor, Shoqata Sindikale e Shërbimit të Jashtëm (SHSAShJ), fton dhe inkurajon anëtarët e shërbimit diplomatik, që përmes pjesëmarrjes së tyre në protestën e sotshme nga ora 17:00, të solidarizohen me këtë nismë e cila na kujton rëndësinë e peshës së reagimit dhe kundërshtimit publik. Nismat e veteranëve kanë qenë dhe mbesin alarm i zgjimit të ndërgjegjejes publike dhe qytetare, për çka, SHSAShJ shfrytëzon rastin të shpreh mirënjohje të thellë dhe përzemërsisht t’i falënderoj.
Për SHSAShJ-në, protesta paraqet nismën e radhës të kundërshtimit të padrejtësisë së vazhdueshme, e cila në vetvete përbën një peshë dhe pengesë për konsolidimin e vazhdueshëm të imazhit të brendshëm dhe ndërkombëtar të vendit. Qëndrimi pasiv dhe indiferent në raport me nevojën për kundërshtimin e dëmeve dhe padrejtësive, është ftesë për ecje në shteg të hapur për ata që i projektojnë ato, kudo dhe kurdo qoftë. E për rrjedhojë, kundërshtimi protestues i padrejtësisë është kthyer në imperativ moral për kundërshtim aktiv qytetar, i cili sot tejkalon çdo interes dhe këndvështrim parcial.
Shpërfaqja e potencialit kundërshtues publik e qytetar kundër padrejtësisë, me automatizëm përfaqëson edhe dedikimin tonë për t’i qëndruar besnik rrugëtimit tonë shteteformues. Kjo është forma më e mirë e rrëzimit të agjendave destruktive që për cak kanë boshtin e identitetit dhe arritjeve të Republikës së Kosovës.
SHSAShJ rikujton që edhe në të bërit diplomaci, ajo çfarë ndërtohet me përkushtim dhe devotshmëri në Prishtinë, është fondacioni më i qëndrueshëm i asaj çfarë anëtarët e shërbimit të jashtëm mund të përfaqësojnë dhe paraqesin në rrafshin ndërkombëtar.
