Kryetari i Partisë Demokratike të Kosovës (PDK), Memli Krasniqi, ka bërë një premtim të fortë për përmirësimin e kushteve të jetesës dhe punës për qytetarët e Kosovës, duke njoftuar një plan të ri për rritje të pagave në fillim të mandatit të qeverisë së Bedri Hamzës.
Sipas Krasniqit, paga për 84 mijë punonjës të sektorit publik, përfshirë mësuesit, infermierët, profesorët, doktorët, policët, ushtarët dhe zjarrfikësit, do të rritet për 50%.
Krasniqi ka theksuar se kjo është një nga prioritetet kryesore të PDK-së dhe një nga hapat që do të ndërmerren për të siguruar që qytetarët e Kosovës të kenë një jetë më të mirë.
“Paga për mësues, infermierë, profesorë, doktorë, policë, ushtarë, zjarrfikës dhe të gjithë ata që janë të punësuar në sektorin publik do të rritet për 50%. Ky është një hap i rëndësishëm drejt një të ardhmeje më të mirë për qytetarët e Kosovës. Ata që e meritojnë më shumë, do të kenë një kompensim të denjë për punën e tyre të palodhur”, ka thënë Krasniqi.
Që nga fillimi i fushatës zgjedhore, kjo ka qenë një nga premtimet që kandidati për kryeministër nga radhët e PDK-së, Bedri Hamza, e ka përsëritur vazhdimisht.
Madje, gjatë një tubimi të mbajtur në Pejë, Hamza theksoi se “veç vdekja më ndal nga rritja e pagave dhe pensioneve”.
